Abahagarariye inzego z’abagore, abinjira n’abasohoka, n’abikorera bahawe impamyabumenyi (Certificates) nyuma y’icyumweru bitoza uburyo bwo gukemura amakimbirane, kubaka ubudahangarwa, n’ubuvuzi bw’ihungabana rituruka ku ihohoterwa rishingiye ku gitsina (GBV).
Kuva ku i tariki ya 22 kugeza ku ya 28 Gashyantare 2026, mu Karere ka Musanze muri “Best Hôtel”, habereye amahugurwa y’amateka yibanze ku buzima bwo mu mutwe n’ubufasha mu by’isozamutima (Mental Health and Psychology Support).
Aya ma hugurwa yateguwe n’umuryango wa “International Alert” ku bufatanye na “ARCT-Ruhuka”, akaba yaragenerwaga abahagarariye inzego z’ingenzi zikora mu mishinga y’iterambere n’imibereho myiza mu turere uyu mushinga ukoreramo, hagamijwe kubaka umuryango ushobora kwigira ku nzitane.
Mu gihe cy’icyumweru cyose, abahuguwe bahawe ubumenyi bwimbitse mu nzego z’ingenzi zireba umuryango nyarwanda uyu munsi; Imiyengetere y’Amakimbirane (Conflict Management), Uburyo bwo gukemura amakimbirane mu mahoro mu muryango no mu kazi. Ubudahangarwa (Resilience), Kwigira ku nzitane n’ibibazo by’ubuzima maze umuntu agakomeza gutera imbere mu ntekerezo.
Uburinganire n’Ubuvuzi bwa GBV, Kwiga ku bitandukanya igitsina-gore n’igitsina-gabo (Gender and Sex) n’uburyo bwo kuvura ihungabana riterwa n’ihohoterwa rishingiye ku gitsina (Mental Health and Psychology Treatment of GBV).
Aya mahugurwa ntiyari ay’ubumenyi gusa, ahubwo yari ay’itoza (ToT – Training of Trainers). Abayitabiriye bavuye mu nzego zinyuranye zirimo; Urwego rw’Abinjira n’Abasohoka (Migration) n’Ibigo nderabuzima bikora ku mipaka umushinga ukoreramo. Abikorera (PSF), Pro-Femmes Twese Hamwe, na Réseau des Femmes, Inama y’Igihugu y’Abagore (CNF), Ishyirahamwe Nyarwanda ry’Abacuruzi bakora Ubucuruzi bwambukiranya Imipaka (ACTR) bo mu turere umushinga “ARCT-Ruhuka” ukoreramo.
Kugeza Ubumenyi kuri Bose
Mu gusoza aya mahugurwa, abayahagarariye bavuze ko intego ari uko buri rwego rwayitabiriye ruzageza ubu bumenyi ku bo ruhagarariye. Biteganyijwe ko abahuguwe bagiye kuba “umusemburo w’impinduka”, bafasha abaturage bafite ibibazo by’ubuzima bwo mu mutwe n’amakimbirane mu miryango, cyane cyane mu bice bikorerwamo ubucuruzi n’imigenderanire y’imipaka.
Abari bitabiriye abahugurwa baturutse mw’Ishyirahamwe Nyarwanda ry’Abacuruzi bakora Ubucuruzi bwambukiranya Imipaka (ACTR)
Nk’ikimenyetso cy’ubumenyi n’ububasha bahawe, abahuguwe bose bashyikirijwe impamyabumenyi (Certificates) zibemerera gutanga ubujyanama n’ubufasha bw’ibanze mu by’isozamutima mu nzego zabo.
Amani Ntakandi
PR and Communication Officer / ACTR
